გარდენია ენდროსებრთა ოჯახის წარმომადგენელი მცენარეა, რომელიც 250-მდე სახეობას აერთიანებს. თუმცა, საოთახო მემცენარეობაში გავრცელებულია გარდენიას მხოლოდ ჟასმინისებრი გარდენია, რომელსაც სასიამოვნო სურნელის გამო მირონის ხესაც ეძახიან. სხვათა შორის, ოთახის პირობებში გარდენიას გახარება არ არის იოლი და გარკვეული წესების ზედმიწევნით დაცვას საჭიროებს. გარდენია ტროპიკული მცენარეა. მას აქვს თეთრი, მოყვითალო და მოვარდისფრო ყვავილები. 

ხალხურ მედიცინაში მისი ფესვებისა და ნაყოფის ნახარშებს იყენებენ სიცხის დამწევად, ანთების საწინააღმდეგოდ, სისხლაღმდგენად სიყვითლის, კანის დაავადებების, მასტიტის, სტომატიტის, ტონზილიტის დროს. ფესვების ნახარში ეფექტურია ფილტვების, ციებ-ცხელების, სისხლდენის, ეპიდემიური გრიპის, ნეფრიტის სამკურნალოდ. დანაწევრებულ ნაყოფს იდებენ ჭრილობებზე, სიმსივნეზე, დანაწვავზე, დაშავებულ ადგილებზე. მისი ნახარშები გამოიყენება თავის ტკივილისა და სასუნთქი გზების, ნაღვლისა და კუჭ-ნაწლავის ანთების, თირკმლების და სხვა დაავადებების სამკურნალოდ. მცენარის სხვადასხვა ნაწილში აღმოჩენილია გლიკოზიდი კროცინი, რომელიც იწვევს ნაღვლდენას. მისი ნაყენებ ტრადიციულად გამოიყენება არტერიული წნევის დასარეგულირებლად. ნაყოფის ნახარში გამოიყენება ორგანიზმის შლაკებისა და ტოქსინებისაგან გასაწმენდად, ჰერპესის სამკურნალოდ.

როგორ მოვუაროთ სწორად:
გარდენია სინათლის მოყვარული მცენარეა, ამიტომ მთელი დღის მანძილზე სრულფასოვან განათებას საჭიროებს. მხოლოდ ზაფხულის ცხელ დღეებში, შუადღის მზეს მოარიდეთ და მზის პირდაპირი სხივები თხელი ფარდით გაუფანტეთ. გარდენია მგრძნობიარეა განათების ცვლილების მიმართაც, ამიტომ მისთვის ადგილის შეცვლას ან ქოთნის შეტრიალებას მოერიდეთ, განსაკუთრებით ყვავილობის დროს.  გარდენიასთვის აუცილებელია ჰაერის მაღალი ტენიანობა, რადგან დაბალი ტენიანობის პირობებში მცენარე ყვავილების ზრდას შეაჩერებს ან შეიძლება ყვავილები დასცვივდეს. ტენიანობის ხელოვნურად ასამაღლებლად კარგი იქნება, თუ ქოთნის სადგამზე სველ კერამზიტს მოათავსებთ, ისე რომ ქოთნის ძირი წყალს არ ეხებოდეს.
აქტიური ზრდის პერიოდში სასურველია, გარდენიას ფოთლებზე დროდადრო წყალიც შეასხუროთ, რადგან ამ დროს მცენარე განსაკუთრებით მაღალ ტენიანობას საჭიროებს.

ზრდის პერიოდში გარდენიას რწყავენ უხვად, მას შემდეგ რაც მიწის ზედა ფენა გაშრება. მცენარე მგრძნობიარეა და ზედმეტი წყალი ვნებს მას. ზამთრის პერიოდში რწყვას უკლებენ. შემოდგომა-ზამთრის პერიოდში რწყავენ ზომიერად - მიწის ზედაპირის გაშრობიდან 2-3 დღის შემდეგ. უნდა მოირწყას ჰაერის ტემპერატურაზე 2-3 გრადუსით თბილი წყლით. თვეში ერთხელ კი ლიმონიანი წყლით უნდა მორწყათ ( ერთ ლიტრ წყალში ჩააწვეთეთ 5-6 წვეთი ლომინი).

სასუქი:

მარტიდან აგვისტოს ბოლომდე გარდენია, ორ კვირაში 1-ხელ, ყვავილოვანი მცენარეებისთვის განკუთვნილი რომელიმე თხევადი სასუქით გაანოყიერეთ. 
სასუქი ინსტრუქციით რეკომენდებულზე ორჯერ ნაკლები უნდა იყოს.

როდის და როგორ გადავრგათ:
გარდენია 2 წელიწადში 1-ხელ, ადრე გაზაფხულზე უნდა გადაირგას. ნიადაგი მჟავე უნდა იყოს. შეგიძლიათ, აზალიებისთვის განკუთვნილი მზა ნიადაგი შეიძინოთ ან თანაბარი რაოდენობის კორდის, წიწვოვანი, ფოთლოვანი მიწისგან, ტორფისგან და ქვიშისგან თავად მოამზადოთ.  კარგი დრენაჟიც არ დაგავიწყდეთ. ამისთვის შეგიძლიათ, მცენარეს ქოთნის ფსკერზე კენჭები მოუფინოთ. ამოიღეთ მცენარე მიწიდან და მსუბუქად შეარხიეთ რომ ხედმეტი მიწა გასცვივდეს, ზოგჯერ ფესვებსაც უმოკლებენ. 

გასხვლა:
ყვავილობის დასრულებისთანავე გარდენიას ტოტები 1/3-ით დაუმოკლეთ, ასე მცენარე უფრო კომპაქტურ ფორმასაც მიიღებს, გახშირდება და ყვავილობაც უხვი ექნება.

როგორ გავამრავლოთ:
როგორც წესი, გარდენიას კენწეროს კალმით ამრავლებენ. ამისთვის საჭიროა: გაზაფხულზე ან შემოდგომაზე მოაჭრათ მცენარეს დაახლოებით, 10 სმ-ის სიგრძის ტოტი და თბილ სუბსტრატში (ტორფის, წიწვოვანი მიწისა და ქვიშის ნაზავში) დააფესვიანოთ. 
კარგი იქნება, თუ სუბსტრატში მოთავსებამდე ტოტს რომელიმე ზრდის სტიმულატორით დაამუშავებთ. დასაფესვიანებელ მცენარეს მინისათბურიც მოუწყვეთ, რომელსაც პერიოდულად გაანიავებთ და დანამავთ. სასურველია ამ პერიოდში თუ 25 გრადუს ტემპერატურაზე ამყოფებთ.
გარდენია ხშირად სხვადასხვა მწერებით ავადდება. მათი აღმოჩენისთანავე საჭიროა, მცენარე რომელიმე ინსეკრიციდით შეიწამლოს. კარგი იქნება, თუ ამ პროცედურას 7-10 დღის ინტერვალებით, 3-ჯერ გაიმეორებთ.