ვისაც დიდხანს უხდება კომპიუტერთან ან საჭესთან ჯდომა, ან სხვადასხვა მიზეზის გამო უწევს თვალების დაძაბვა თვალები ეღლება და დროებით უქვეითდება მხედველობა. გაითვალისწინეთ შემდეგი რჩევებვი:

სამუშაო დღის შემდეგ დაქანცული თვალებისთვის კარგი იქნება, ჩაის ცივ ნაყენში დასველებული ბამბის ტამპონები, რომლებიც კარგად უნდა გაიკრათ ნაჭრით, 15-20 წუთის განმავლობაში.
გადაღლილ თვალებს ძალიან შველის, თუ ქუთუთოებს საჩვენებელი და შუა თითით დააწვებით, სანამ ყვითელი წრეები არ წარმოიქმნება. შემდეგ ერთბაშად აუშვით თითები, გაიმეორეთ 2-3 ჯერ.
ძლიერი ნერვიულობისა და სტრესის შედეგად დროებით დაქვეითებული მხედველობის დროს მაგრად მოხარშული კვერცხი გაჭერით შუაზე, ამოაცალეთ გული და ცხელი ცილა დაიდეთ თვალებზე ისე, რომ გუგებს არ ეხებოდეს. 

თვალებზე აიფარეთ ხელის გულები და დაელოდეთ სანამ ფერადი ნათება სრულად არ გაქრება. სრული სიბნელის გაჩენის შემდეგ გაახილეთ თვალები და სწრაფად დაახამხამეთ.

გვირილას უხსოვარი დროიდან იყენებენ კოსმეტიკაში. მისი ნაყენი განსაკუთრებით სასარგებლოა თვალების სიწითლისა და გაღიზიანების დროს. 3 სადილის კოვზი გვირილის ყვავილი მოათავსეთ მომინანქრებულ ჭურჭელში, დაასხით 200 მლ ოთახის ტემპერატურის ანადუღარი წყალი, მჭიდროდ დაახურეთ თავსახური და 10-15 წუთით გააჩერეთ წყლის აბაზანაზე. შემდეგ გააცივეთ და გადაწურეთ, კარგად გამოწურეთ დოლბანდში ჩარჩენილი გვირილაც. ნაყენი სიგრილეში შეინახეთ არა უმეტეს 3 დღე-ღამისა. თუ ამ ნაყენში დასველებულ ბამბის ტამპონებს დღეში რამდენჯერმე დაიდებთ თვალებზე, დაღლილობას საერთოდ ვეღარ იგრძნობთ.

თვალებისთვის სასარგებლოა კამის, ოხრახუშისა და პიტნის ნაყენებიც.

თვალების მოვლისთვის ასევე, გამოიყენება კარტოფილის წვენი. გათალეთ კარტოფილი, ჩახეხეთ წმინდა სახეხზე და გამოწურეთ წვენი დოლბანდით. ამ წვენში დაასველეთ დოლბანდის ოთხი ფენა და დაიდეთ თვალებზე 15-20 წუთით. შემდეგ ჩამოიბანეთ გრილი წყლით. პროცედურა ჩაიტარეთ კვირაში 2-3-ჯერ. გამოიყენება აგრეთვე თვალების ანთების დროს, ქუთუთოების შეშუპებისა და შესიებული თვალებისთვის.
მოცვი აძლიერებს მხედველობას და ხელოვნური განათების პირობებში ხანგრძლივად მუშაობის შედეგად ხსნის თვალების დაღლილობას. მიირთვით როგორც ნედლი, ასევე გამხმარი მოცვი.

10 გრამი ღიღილოს ხმელი ყვავილი ჩაყარეთ 200 გრამ მდუღარე წყალში და 2 საათი  გააჩერეთ. ამ სითხეში დასველებული დოლბანდით თვალებზე საფენები გაიკეთეთ.
თუ თვალები გადაგეღალათ, თვალის კაკლები რამდენჯერმე სხვადასხვა მხარეს ატრიალეთ: მარჯვნივ - მარცხნივ, ზემოთ და ქვემოთ, მაგრამ თავი უძრავად გქონდეთ.
 მხედველობის გაუარესების შემთხვევაში, თვალები ცივი წყლით ან მარილშეზავებული ცივი წყლით ამოიბანეთ.
თვალის დაღლილობის მოსახსნელად დახატეთ მინაზე წერტილი, დადექით მისგან 30 სანტიმეტრის დაშორებით და ხან მას დააკვირდით, ხან რომელიმე შორეულ საგანს.

თვალების მოვლის რამოდენიმე წესი:

1. თვალების სიჯანსაღისთვის მეტად მნიშვნელოვანია არანაკლებ რვასაათიანი ძილი.
2. დილით, პირის დაბანის შემდეგ, ქუთუთოებზე მატონიზებელი კრემი შეიზილეთ, საღამოს, მაკიაჟის მოცილების შემდეგ კი - მკვებავი.
3. თვალების ირგვლივ არსებული მიმიკური ნაოჭების შესამცირებლად და მათი პროფილაქტიკისთვის რეგულარულად იკეთეთ შემდეგი ნიღაბი: 1 სადილის კოვზ შემთბარ თაფლს შეურიეთ შვრიის ფქვილი (რამდენსაც შეიზელს) და კარგად გაცივებული ერთი კვერცხის ათქვეფილი ცილა. ეს ნარევი დაიდეთ მიმიკური ნაოჭების არეში. როგორც კი გაშრება, თბილი წყლით ჩამოიბანეთ.
4. სასარგებლოა თვალების მსუბუქი მასაჟი დილა-საღამოს. თითის ბალიშები მსუბუქად ირტყით თვალების შიგნითა კუთხეებიდან საფეთქლისკენ.

ნუ დაიზარებთ თვალების მოვლას. გახსოვდეთ, თვალების სილამაზე მნიშვნელოვანწილად არის დამოკიდებული მათ ჯანმრთელობაზე. მოციმციმე თვალები, სხივოსანი მზერა და ახალგაზრდული გამოხედვა ადამიანს განსაკუთრებულ ხიბლს სძენს.

მხედველობის ორგანოსთან ერთად განსაკუთრებული მოვლა და გაფრთხილება სჭირდება ქუთუთოებს და თვალების ირგვლივ არსებულ კანს. ბევრს თვალების ქვეშ არსებული ტომრები მეტისმეტად აღელვებს. ტომრებს სხვადასხვა რამ აჩენს - დაღლილობა, უძილობა, ცხოვრების არაჯანსაღი წესი, შინაგან ორგანოთა დაავადებები... თუ თქვენი ჯანმრთელობა და გარეგნობა გაღელვებთ, აუცილებლად გაარკვიეთ თვალების ქვეშ ტომრების გაჩენის მიზეზი და იზრუნეთ მის აღმოფხვრაზე.